Page 122 - FK Kerpen Heft 2024_MT_web

Fröher wor alles . . .

Et weed immer die schön ahl Zick besunge. Dat es hügg jenauesu wie fröher, denn och do
daachte mer immer aan dat Verjangene. Mer denk immer aan dat zoröck wat jewäss es.
– Domols wor alles besser un jemütlicher – wor et och.
Dat jeiht jedem esu. Dobei kann keiner jenau sage wann dann die Zick wor, wo et am allerbess
jewäss es. Trotzdäm luurt mer jään zoröck, als mer noch met selvsjemaahte Kostümcher, dä
decke Trumm un der Quätsch durch de Altstadt un och durch et Veedel jetrocke es.
Im Bollerwagen wood et Pittermännche jetrocke. Jet Aädäppelschlot un e paar Brütcher
wooren och dobei.
Et wood och keinen Buhei dovon jemaht, wenn de Quös met dobei woore. En der nöchste
Weetschaff spillte mer dann, mih schlääch als rääch, neue un ahle Leedcher, un all Jäss deihten
metsinge. Dat wor och ärg nüdich, domet die Melodie zomindest einijermaßen hinkom. Dat
do reichlich schräg Tön bei erus kome, wood einfach hinjenomme. Ävver der Spass wor riesig
un och dä Weet hatt sing Freud. Klor, dat noh däm Spill dat eine ov andere Kölsch jedrunke
woode es. Un weil immer och ene Püngel Pänz dobei woor, hatten die jenauesu vill Spass. Och
deshalv, weil et jo reichlich Limo un bestemp e Stöck Schokelad jov. Esu en Stöck wat he un
do dä „Veedelsschupo“, och „Bleu“ ov „Schmier“ jenannt, op der Stroß verdeilen deiht. Verpack
woren die immer in lila, jrönem ov blauem Papier.
Schon wigg för Fastelovend deiht sich dä Bazillus breit maache. Do wood unger dä Pänz jefrog:
„Wat maskeest do dich?“
„Ich? – Ich weed ene Kohbeu.“
Ne andere däht rofe: „Un ich ene Indijaner!“
Widder ne andere sproch: „Ich weede ävver ne Klooon.“
Un esu deihten sich die Pänz an dä Fastelovendsdag in bonte Klamotte op der Stroß treffe und
hatte vill Spass. Dobei wor et schön aan zo luure, wenn ene Kohbeu met Knallplättsche-Pistol
met enem Seemann, un andere Fastelovendspänz Höppe-Kässje spillten.
Esu deihten sich die Pänz de Zick verdrieve, beför et met Mam un Pap, Ühm un Tant un däm
Rest der Famillisch losjing. Klor, et wood dobei nit op die Uhr jeluurt un die Pänz durften länger
opblieve un späder als söns in et Bett jon.
Et klingk hügg noch bei manchem dä schräje, ävver schöne Stroßejesang met Trum un Quätsch
im Ohr. „Die Ahl met däm Schirm ohne Kröck...“, wor e janz besonders Leedche, wat mer
övverall hüre kunnt.
Rusemondag kom dann die Zick, als alle Pänz sich trofe, öm hinger däm Zog her zo laufe, öm
die eine ov andere Kamell zo fange. Do hat keiner ne Büggel met, denn die söße Sache woo-
den tirek jejesse.
Manche Panz es däm Fastelovend treu jeblevve un jeiht hügg selver met en däm Zoch.
Däm Fastelovend es et zo jönne, dat och hügg vill Pänz däm schöne Fess treublieve.
Dann schriev vielleich ne andere in fääne Johre, wat dat hügg för en joode Zick jewäss wor.

© A. Kastleiner